دعا قبول کیوں نہیں ہوتی

دعا قبول کیوں نہیں ہوتی

ایکسکیوز می سر !۔۔۔طالب علم کی آواز نے  مجھے رکنے پر مجبور کر دیا ۔

کچھ فاصلے سے مجھے ایک طالب علم دوڑتا  ہوا نظر آیا شاید یہ ہی وہ طالب علم ہے جس نے مجھے آواز دی  اتنی دیر میں طالب علم قریب آگیا ۔۔۔۔۔

سر ! سر! آپ سے ایک سوال پوچھنا تھا  طالب علم کا سانس پھول رہا تھا ۔

پوچھو بیٹا ! لیکن پہلے سانس لے لو  میں آپ کی بات سننے سے پہلے کہیں نہیں جا رہا  ۔میں نے  مسکراتے ہوئے جواب دیا 

سر ! یہ دعا قبول کیوں نہیں ہوتی جب کہ اللہ تعالیٰ فرماتا ہے 

ادْعُوْنِيْٓ اَسْتَجِبْ لَكُمْ  القرآن ۴۰ :۶۰

مجھ سے دعا کرو میں قبول کروں گا

لیکن دعا قبول نہیں ہوئی میں نے بہت دعائیں مانگی ہیں سر ! پر میری  دعا قبول نہیں ہوئی ۔۔۔۔۔اگر کوئی خدا ہوتا تو دُعا ضرور قبول کرتا  خدا نہیں ہے سر ! خدا نہیں ہے سر ! 

۱۷ سال کا نوجوان مایوسی کے گرداب میں ہچکولے کھا رہا تھا  میں نے اس کے کندھے پر شفقت سے ہاتھ رکھا   اور اسے لے کر اپنے   روم کی طرف بڑھ گیا ۔

آج تمہیں ایک قصہ سُناتا ہوں   میں بھی تمہاری عمر میں تھا  جذباتی عمر، مسجد پاپندی سے جاتا تھا  اور بالکل ایسے ہی سوچتا تھا  جیسے آج کا نوجوان سوچتا ہے ۔ بس ادھر ہم دعا کریں اور ادھر پوری ہو نی چاہیے ۔۔۔۔۔لیکن ہر دفعہ ایسا نہیں ہوتا ،کبھی ہو بھی جاتا ہے ۔۔۔۔۔

میں اپنے بابا جی کے پاس چلا گیا ۔۔۔۔۔ بالکل ویسے ہی جیسے آج تم میرے پاس آئے ہو ۔

میں نے بھی بابا جی سے وہی شکایت یا شکوہ کیا جو تم نے مجھ سے سوال کیا ہے۔

بابا جی  مسکرا دئیے  بالکل ویسے ہی جیسے تمہارے سوال کے جواب میں،میں مسکرایا  ،مجھ سے کہنے لگے سب کو چھوڑ پتر ! یہ بتا یہ سوال کا جواب میں تجھے دوں یا امام غزالی سے  پوچھے گا۔

میں نے کہا بابا جی ! امام غزالی کا تو انتقال ہوئے صدیا ں بیت گئیں کیا  عالم ِ مراقبہ میں ملاقات ممکن ہے ۔

بابا جی نے کہا : پتر ! رات عشاء بعد میرے پاس آنا  آج تجھے امام غزالی کی بارگاہ میں لے کر چلیں گے ان کے درس کی محفل میں بیٹھیں گے ان کا درس سُنیں گے۔

میں اپنا سوال بھول گیا اور خوشی خوشی گھر واپس چلا آیا کہ آج بابا جی امام  غزالی سے ملاقات کرائیں گے ۔۔۔۔

رات عشاء بعد جب باباجی کے پاس پہنچا تو  بابا جی نے کہا :آؤ پتر آؤ !

میں اور بابا جی بالکل اکیلے تھے میرے سامنے ڈیسک پر امام غزالی کی کتاب احیاء العلوم موجود تھی ۔

بابا جی  نے مجھ سے کہا : اب تم اپنا سوال دہراؤ

میں نے سوال دہرا دیا  دعائیں قبول کیوں  نہیں ہوتیں حالانکہ اللہ تعالیٰ فرماتا ہے ۔

ادْعُوْنِيْٓ اَسْتَجِبْ لَكُمْ  القرآن ۴۰ :۶۰

مجھ سے دعا کرو میں قبول کروں گا

مجھے ایسا لگاکہ میں امام غزالی کی مجلس میں موجود ہوں   امام غزالی فرما رہے تھے  حضرت ابراہیم بن ادھم سے بھی یہ ہی سوال ہوا تھا 

حضرت ابراہیم بن ادہم  نے فرمایا : تمہارے دل مردہ ہو گئے ہیں 

سوال کیا : دل کس چیز سے مردہ  ہو گئے ؟

حضرت ابراہیم بن ادہم نے فرمایا :آٹھ باتوں سے 

سوال کیا وہ آٹھ باتیں کیا ہیں ؟

تم نے اللہ تعالیٰ کے حق کو پہچانا لیکن اس کا حق ادا نہیں کیا 

تم نے قرآن کی تلاوت کی مگر اس کی حدود پر عمل نہ کیا

تم نے اللہ و رسول ﷺ سے محبت کا دعویٰ کیا لیکن رسول اللہ ﷺ کی سنت پر عمل نہیں کیا 

تم نے کہا ہم موت سے ڈرتے ہیں لیکن اس کی تیاری نہیں کی ۔

اللہ تعالیٰ نے شیطان کو تمہارا دشمن قرار دیا لیکن تم نے اس سے موافقت کی 

تم نے کہا ہمیں جہنم سے ڈر لگتا ہے  لیکن اپنے جسم کو اس  میں ڈالنے سے نہیں بچایا 

. تم نے کہا ہمیں جنت پسند ہے مگر اس کے لیے نیک عمل نہیں کیے 

جب تم صبح بیدار ہوتے ہو تو اپنے عیبوں کو پس پشت ڈال کر   دوسروں کے عیب نکالنا شروع کر دیتے ہو 

اب تم خود ہی بتاؤ  تم اپنے رب کو ناراض بھی کرو اور دعا کی قبولیت کی تمنا بھی کرو ؟

احیاء العلوم کے اوراق میرے سامنے  کھلے  ہوئے تھے بابا جی کے ساتھ ساتھ میری بھی آنکھیں نم تھیں تو بیٹا ! جب ہمارے اعمال ایسے ہوتے ہیں ۔۔۔۔۔جب ہم اپنے رب کو ناراض کر دیتے ہیں تو پھر  دعائیں قبول نہیں ہوتیں ۔۔۔۔

کبھی کبھی اسی طرح بزرگوں کی کتب کھول کر (پڑھنے کے لیے ) بیٹھ جایا کرو اور تصور کرو وہ درس دے رہے ہیں تم سُن رہے ہو  تمہاری رہنمائی ہو جائے گی ۔۔۔۔۔۔بس تب سے عادت بنا لی ۔ اکثر مطالعہ یہ سوچ کر کرتا ہوں صاحبِ کتاب میرے سامنے ہیں اور مجھے درس دے رہے ہیں ۔

میں نے  اس نوجوان کو دیکھا پہلے اس کی آنکھیں شدت ِ مایوسی کے سبب نم تھیں اور اب اس کی آنکھوں میں ندامت کے 

موتی چمک رہے تھے ۔۔۔۔۔میرے نوجوان! اپنے رب کے ہو جاؤ کائنات تمہاری ہو جائے گی ۔

تحریر: محمد اسمٰعیل بدایونی

لبرل ازم کا ہولناک انجام

لبرل ازم کا ہولناک انجام

تحریر: محمد اسمٰعیل بدایونی

شاہ زیب عام لڑکوں سے بہت مختلف تھا  ۔

گرل فرینڈ سے شادی نہیں کرنی اور جس سے شادی کرنی ہے اسے گرل فرینڈ نہیں بنانا ۔لڑکے عموما یہ ہی سوچتے ہیں ۔

شاہ زیب سے کالج ہی کے زمانے میں ہی مجھے محبت ہو گئی تھی  ۔۔۔۔ اس نے مجھ ہی کو گرل فرینڈ بنایا اور مجھ ہی سے شادی بھی کی ۔۔۔۔میں بھی شاہ زیب کی طرح براڈ مائینڈ ،روشن خیال اور لبرل تھی ۔۔۔۔۔دقیانیوسیت اور مولویوں سے مجھے اللہ واسطے بیر تھا ۔۔۔

ہم نے جو خواب دیکھے انہیں پانا اس زمانے میں مشکل ہی ناممکن بھی  تھا اور آج تو شاید نا پید ہو چکے مگر شاہ زیب  جتنا اچھا شادی سے پہلے تھا شادی کے بعد بھی اتنا اچھا ہی ثابت ہوا ۔۔۔۔۔وہ مجھے ہر جگہ گھمانے لے جاتا اپنے دوستوں سے بھی ملواتا ۔۔۔۔میں نے کہا نا ! ہم روشن خیال ، براڈ مائنڈ اور لبرل تھے ۔۔۔۔

میری زندگی کو برباد اسی روشن خیالی ، براڈ مائنڈ اور لبرل سوچ  نے کیا۔

یہ انہی دنوں کی بات ہے جب میں شاہ زیب کے نکاح میں آئی تھی ۔۔۔۔ہر رات شبِ براءت اور ہر دن یوم ِعید تھا ایک دن شاہ زیب مجھے اپنے باس سے ملوانے اپنے آفس لے گئے   گر چہ وہ مجھ سے میری شادی میں بھی مل چکے تھے ۔شاہ زیب کے باس مجھ سے بہت اچھے انداز میں ملے میری خوبصورتی اور میک اپ نے انہیں گھائل کر دیا تھا ۔۔۔۔آپ کی خوبصورتی سے کوئی شخص گھائل ہو کر آپ کے قدموں میں  گر جائے ۔۔۔۔۔

شاہ زیب کے باس نے کہا :شاہ زیب !میری سیکریٹری کی پوسٹ تو خالی ہے میم اگر راضی ہو ں تو انہی کو رکھ لیا جائے ۔۔۔ 

لیکن میں نے معذرت کر لی ۔

شاہ زیب نے انہیں گھر آنے کی بھی دعوت دی  بلکہ یوں کہیے گھر پر  کھانے کی دعوت دے ڈالی  جو شاہ زیب کے باس نے بخوشی و رغبت قبول کر لی ۔

شاہ زیب کے باس    جب گھر آئے  تو ان کی نگاہوں میں موجود پیغام مجھے  سمجھ آرہا تھا عورت کو اللہ تعالیٰ نے یہ کمال کی حس دی ہے وہ مرد کی  خبیث نگاہوں کو با آسانی سمجھ لیتی ہے ۔۔۔۔

پھر رفتہ رفتہ انہوں نے مجھ سے مراسم بڑھانے کی کوشش کی ایک دن صاف صاف لفظوں میں کہا : شاہ زیب کی ترقی ،تنخواہ میں اضافہ ، گاڑی اور فلیٹ لینے میں اگر میں ان کی مدد کروں تو  اگلے دن ہی یہ سب چیزیں شاہ زیب کے پاس ہوں گی ۔۔۔۔

لیکن یہ میں کیسے کر سکتی تھی ۔۔۔مجھے اس دن اس شخص ے بہت گھن آئی اور میں صاف انکار کرکے گھر آگئی ۔

ایک ہفتہ ساتھ خیریت کے گزرا اور اس کے بعد شاہ زیب کو غبن کے الزم میں آفس سے نہ صرف نکال دیا گیا بلکہ اس کی ایف آئی آر بھی کٹوا دی گئی ۔۔۔۔مقدمہ بازی آپ جانتے ہیں نا ! غریبوں کے بس کی بات کہاں ؟ آہستہ آہستہ زیور بکا چیزیں بکیں لیکن مسئلہ حل نہیں ہو ا آخر میں باس نے پھر آفر کی اور  شاہ زیب کی امی شاید ممتا سے مجبور تھیں کہنے لگیں اپنے شوہر کو بچانے کے لیے یہ قربانی دے دو ۔۔۔۔۔۔

میں سوچنے لگی کیا  شوہروں کی ترقی کے دروازے قیمتِ عصمت پر کھلیں گے ؟

لبرل ازم کی  اس غلاظت نے مجھے یہ کرنے پر مجبور کر دیا۔۔۔۔۔شاہ زیب گھر آگئے لیکن شاید میں دربدر ہو گئی ۔۔۔۔باس کی فرمائشوں کا سلسلہ رکا نہیں بلکہ ان کے دوستوں تک طویل ہو گیا اور جب شاہ زیب کو یہ ساری خبر ہوئی تو شاہ زیب نے مجھے چھوڑ دیا ۔۔۔۔۔قصور وار کون ؟

شاہ زیب ؟میں ؟یا پھر باس 

آج جب  بہت دنوں کے بعد قرآن کی تلاوت کی تو مجھے اپنے سوال کا جواب مل   گیا

يٰٓاَيُّهَا النَّبِيُّ قُلْ لِّاَزْوَاجِكَ وَبَنٰتِكَ وَنِسَاۗءِ الْمُؤْمِنِيْنَ يُدْنِيْنَ عَلَيْهِنَّ مِنْ جَلَابِيْبِهِنَّ ۭ ذٰلِكَ اَدْنٰٓى اَنْ يُّعْرَفْنَ فَلَا يُؤْذَيْنَ ۭ وَكَانَ اللّٰهُ غَفُوْرًا رَّحِيْمًا  احزاب  59

اے نبی! اپنی بیبیوں اور صاحبزادیوں اور مسلمانوں کی عورتوں سے فرمادو کہ اپنی چادروں کا ایک حصہ اپنے منہ پر ڈالے رہیں یہ اس سے نزدیک تر ہے کہ ان کی پہچان ہو تو ستائی نہ جائیں  اور اللہ بخشنے والا مہربان ہے

 میری پیاری بہنو!

میں نے اپنے رب کی بات کو ٹال دیا تھا میں ستائی گئی اور اس حد تک ستائی گئی کہ زندگی ایک روگ بن چکی ہے۔۔۔۔۔تم ایسا مت کرنا ،یہ پردہ تمہاری حفاظت کا ضامن ہے ۔۔۔۔جب حفاظت کی شیٹ یا جیکٹ آپ خود اتار کر پھینک دیں گی تو پھر زخم بھی لگے گا اور شاید موت بھی ہو جائے ۔۔۔۔۔لبرل ازم اور روشن خیالی کی بیماری بہت عام ہو چکی ہے ۔۔۔۔۔

خدارا  ! اسے مولوی  کا مسئلہ نہ سمجھیے یہ آپ خواتین  کی حفاظت پر مبنی اسلام اور پیغمبرِ اسلام ﷺ کا نظام ہے ۔۔۔۔۔

جہاد سے دہشت گردی تک

سپہ سالا ر  اس فتنے کے خاتمے کے لیے روانہ ہو چکا تھا نعرہ تکبیر اللہ اکبر کی گونج سے وادیاں گونج رہی تھیں ۔۔۔۔

شیخ الجبال حسن بن صباح کو اس لشکر کے آنے کی خبر مل چکی تھی ۔۔۔۔ایک ہزار افراد پر مشتمل لشکر  جذبہ جہاد سے سرشار تھا اس سے مقابلہ آسان نہیں تھا اس کی  ساری فدائی فوج کم پڑ جاتی اگر دوبدو مقابلہ ہوتا ۔۔۔۔

شیخ الجبال  حسن بن صباح نے اپنے ایک خاص آدمی کو طلب کیا اور اس کو حشیش کا نشہ دے کر کہا اس لشکر کو گمراہ بھی کردو اور انہیں یہ نشہ  پلا دو تاکہ کچھ ہی دیر میں بھٹک کر تھک جائیں ۔۔۔۔۔ان کا زادِ راہ برباد ہو جائے ۔۔۔۔ان کی ہمت ختم ہو جائے ۔۔۔۔پر یہ اگر جرأت کر بھی بیٹھیں تو فدائیوں کے لیے ترنوالہ ثابت ہوں ۔۔۔۔۔

یہ وہ وقت تھا جب حج سے قافلے واپس لوٹ رہے تھے شیخ الجبال کے خاص آدمی نے حاجی کا روپ دھارا اور جا کر  اس لشکر سے مل گیا  لشکر کے ایک امیر نے اس سے کہا : تم نے  شیخ الجبال حسن بن صباح  کا نام سُنا ہے

حاجی نے جواب دیا  اس  راندہ ردگاہ بد بخت ابلیس کا نام کس نے نہیں سُنا  حجاز سے لے کر یہاں تک   اسی کا نام سنتا آرہا ہوں لوگ تو اسے اللہ ، نبی ، ولی اور امام نہ جانے کیا کیا کہتے ہیں۔

کیا تم ہمیں اس کا قلعہ الموت کا راستہ بتا سکتے ہو ؟ امیر نے سوال کیا

کیوں نہیں اس نیک کام میں  ،میں آپ کے ساتھ ہوں  اگر میرے ساتھ میری  بیوی نہ ہوتی تو آپ کو وہاں تک پہنچا کر آتا  ۔

آپ سے دعا کی درخواست ہے امیر نے  حاجی سے درخواست کی

آپ یہ مدینے کی کھجور کھائیے اور بلکہ یہ سارے لشکر میں  ایک ایک ،سب سپاہیوں  کو کھلا دیجیے اس کے ساتھ ہی یہ آب ِ زم زم ہے  اگر آپ کے پاس پانی موجود ہو تو  میں اس میں ملا دیتا ہوں تاکہ سارا لشکر اس بابرکت  پانی کو پی لے اور اس کی برکت سے فتح آپ کے قدموں کو چومے ۔۔۔۔۔۔

ذرا سی دیر میں  بھنگ پورے  لشکر میں پھیل گئی ۔

اس کا ذائقہ کچھ عجیب سا نہیں اور اس میں گٹھلی بھی نہیں ہے ۔۔۔امیر نے سوال کیا

یہ وہاں کی خا ص کھجور ہے   امیر محترم !  حاجی نے ادب سے کہا

اس کے بعد یہ قافلہ اپنی منزل سے بھٹک گیا  جب کچھ ہوش آیا تو آدھے سے زیادہ لشکر غائب تھا کچھ تو راستے سے واپس چلے گئے سامان زادِ راہ برباد ہو گیا ۔۔۔حاجی نے جو راستہ بتایا تھا  وہ ایک اونچی جگہ جا کر بند ہو جاتا   لشکر جب واپس پلٹا تو کئی گھوڑے اور سپاہی اس بلند چوٹی سے  گہری کھائی میں جا گرے ۔

تھکا ماندہ سپہ سالار جب  حسن بن صباح کے سامنے پہنچا تو  حسن بن صباح نے اس سے پوچھا تم کیوں آئے ہو ؟

حاجی کا دیاہواآب  زم   زم  اپنا اثر دکھا رہا تھا سپہ سالار بھول چکا تھا وہ یہاں کس مقصد کے لیے آیا ہے ۔۔۔۔

حسن بن صباح نے  بازو اوپر اٹھائے اور آسمان کی طرف د یکھتے ہوئے  کہا

فرشتے اتر آئے ہیں ۔۔۔۔۔دشمن شکست کھا چکا۔

تیر اندازوں کو اشارہ کیا اور سپہ سالار کے ساتھ آئے دونوں سپاہی مار دئیے گئے تم بھی چلے جاؤ سلجوقی  سپاہی ورنہ قہر خداوندی کا شکار ہو جاؤ گے ۔۔۔۔ایک سپاہی بھی زندہ لوٹ کر نہیں جا سکے گا ۔

بد  حواس سپہ سالار واپس  پلٹا اور چل دیا

قلعے کے نیچے ایک شور بپا تھا امام کا معجزہ دیکھو ۔۔۔۔ واہ واہ کا شور بپا تھا

مجھے ایسا لگا جیسے تاریخ مجھے یہاں کچھ سکھانا چاہتی ہے ۔۔۔۔

تمام  سوالات میرے سامنے  سراپا احتجاج تھے ۔۔۔۔۔

کیا پہلے جہاد نہیں کیا ہم نے ؟ ۔۔۔۔۔انجام معلوم ہے ؟۔۔۔۔۔بارود اپنے ہی گھر میں پھٹنے لگا تھا ۔۔۔۔۔ایک مسلمان دوسرے مسلمان پر بندوق تانے ہوئے تھا ۔۔۔۔مرنے والا بھی مسلمان مارنے والا بھی مسلمان ۔۔۔۔ہمارے اپنے کندھوں پر ہمارا اپنا ہی لاشہ تھا۔۔۔۔۔اب تم ہی بتا ؤ یہ’’ جہاد سے دہشت گردی تک ‘‘ سفر پر تم کیا کہو گے ؟۔۔۔۔الحاد و سیکولر ازم کی راہ کون ہموار کررہا تھا؟۔۔۔۔

سوالات کی تند و تیز آندھی  نے مجھے ہلا دیا ۔۔۔۔۔مجھے سچائی کا سامنا  تھا

پھر ایسا ہی ہوا تاریخ کے تمام  اوراق تیزی سے  اڑنے لگے  ۔۔۔۔ٹمٹماتا دیا  بھی اپنی آخری سانسیں لے رہا تھا کہ یکا یک تیز ہوا نے اس کی سانسوں کا گلا گھونٹ دیا ۔۔۔۔۔لیکن تاریخ  کے اوراق بتا رہے ہیں  ۔۔۔۔۔۔۔۔۔۔۔

تم مظلوموں کے لیے جہاد کی بات کرو گے   تو یاد رکھنا! تمہارا دشمن حسن بن صباح سے کہیں زیادہ چالاک و مکار ہے ۔۔۔۔۔۔

آبِ زم زم اور کھجوروں کے تبرک میں کیا موجود ہے ؟۔۔۔۔جبہ و دستار میں کون ہے ؟۔۔۔۔۔قال اللہ و قال  الررسول  ﷺ کی آوازوں کے عقب میں کون چھپا بیٹھا ہے ؟۔۔۔۔

تعاقب کرو!!!!!!!!!!!سوچنے کی باتیں ہیں یہ سب ۔۔۔۔سب مسالک کے لیے ۔۔۔۔۔۔

یاد رکھنا !!!

یہ صباحیت رنگ بدلتی ہے ۔۔۔۔۔۔کسی بھی روپ میں کہیں بھی ہو سکتی ہے ۔۔۔۔۔امام کعبہ کے روپ میں کرنل لارنس آف عربیہ تم سے پوشیدہ تو نہیں ہو گا ۔۔۔۔۔فقیر کے  بھیس میں مہاجنوں کی کمی  نہیں۔۔۔۔پیر و مرشد ، مفتی صاحب ، اکابر سے لے کر مقابر تک جگہ جگہ صباحیت کے جال بچھے ہوئے ہیں ذرا بچ کر ۔۔۔۔۔

تکبیر جہاد کی گونج سے دشمن کی جگرکانپ اٹھتاہے۔۔۔۔۔۔۔۔۔۔

پھر صباحیت چالیں چلتی ہے ۔۔۔۔۔۔۔تیز ہوا نے ایک مرتبہ پھر تاریخ کے صفحات کو بکھیر دیا

کیسی چالیں ؟ میں ان کی ہر چال کو الٹ دوں گا میں نے ایک عزم سے کہا

سنو! اس کی چال سمجھ لو ۔۔۔۔

  تمہاری صفوں میں چھپا ہوا حسن بن صباح  امریکہ مردہ باد کا نعرے لگاتا جاگ اٹھتا ہے اور قلعہ الموت میں بیٹھ کر  اپنے فدائیوں سے کہتا ہے ہمارا اصل ہدف ہندوستان کے بت کدے نہیں ہیں بلکہ ہمارا اصل ہد ف  عبد اللہ شاہ  غازی کا مزار ہے ۔۔۔۔داتا دربار ہے یہ شرک کے اڈے ہیں ہمیں انہیں اڑانا ہے ۔۔۔۔نبی کریم ﷺ کا مزار پر انوار صنم اکبر ہے اس کو جب موقع ملے گا گراد یں گے۔۔۔۔

یہ صباحیت ہے

یہ حسن بن صباح تمہاری صفوں میں موجود  چند نادانوں کی غلطی کی سزا پوری  قوم کو دینا چاہتا ہے ہر وہ شخص  جو اکابر پرستی میں مبتلا بھی نہیں اسے گستاخ قراردے کر  تمہارے مد مقابل کھڑا کر دیتا  ہے ۔۔۔۔۔۔

یہ صباحیت ہے

یہ حسن بن صباح  فروعی مسائل سے چھیڑ چھاڑ کرتا ہے اور اسلام کے دفاع اور کفر کے خلاف نکلنے والے لشکروں کو آپس  میں لڑا دیتا ہے ۔۔۔۔۔یہ وہ صباحیت  ہے اگر تم نے اس سے جان نہیں چھڑائی تو تم کامیاب نہیں ہو سکو گے ۔

تم روس کو ٹکڑے ٹکڑے کر دو گے ۔۔۔۔۔۔۔۔  مگر ۔۔۔۔۔۔۔۔

پھر تمہاری صفوں میں موجود حسن بن صباح مزارت کو بموں سے اڑوائے گا ۔۔۔۔ایک دوسرے پر کفر و شرک اور گستاخ  کے فتوے لگا کر قتل کروائے گا ۔۔۔۔۔۔۔۔

مسجد  سے لے کر مزار تک اور محافلِ میلاد سے لے کر  مدارس تک مذبح خانے بن جائیں گے ۔

دوستو! اختلافات کو حل کر لو اور بانجھ بحث کو سمیٹ لو۔

تاریخ سے فرار ممکن نہیں ۔۔۔۔۔۔۔۔۔اے امت ِ مسلمہ جب تمہیں کوئی  انتشار کی ایسی دعوت دے تو سمجھ جانا  تمہاری صفوں میں کوئی حسن بن صباح موجود ہے جو تمہارے خون کے ذریعے صباحیت کا پرچار کررہا ہے ۔۔۔۔۔

اسوۂ رسول ﷺ کو اپنے پیش نظر رکھنا آپ ﷺ نے پہلے تربیت فرمائی تھی  ۔۔۔۔۔

یاد رکھنا !جہاد سے قبل تربیت بہت  ضروری ہے ورنہ کوئی بھی  حسن بن صباح     تبرک سےتقدس تک کا علم بلند کر کے نقب لگا جائے گا ۔

تحریر:   محمد اسماعیل بدایونی

کربلاِ ثانی سے بنتِ حوا کی پُکار

دلوں کو جھنجھو

دلو

برما کی مظلوم  مسلمان بیٹی   

جلد ا ز جلد اس پیغام کو مسلمانوں تک پہنچائیں

Share🌐شئیر

بستی  میں خوف و ہراس پھیل چکا تھا ، خوف کے سبب کلیجے منہ کو آگئے  ۔۔۔۔چاروں طرف سے آگ کے شعلے بلند ہو رہے تھے ۔

مائیں اپنے بیٹوں کو دیکھ رہی تھی  جو کچھ ہی دیر بعد بے رحمی سے ذبح کر دئیے جائیں گے ۔۔۔۔۔۔خوف زدہ نگاہوں نے بیٹیوں  کے وجود کا طواف کیا ہزار ضبط کے باجود ماؤں کی  چیخیں نکل گئیں ۔۔۔۔

کچھ ہی دیر میں سفاک درندے بستی میں پہنچ چکے تھے ۔۔۔۔مکروہ چہروں سے چھلکتی سفاکی  بے بس نوجوانوں کو ذبح کرنے کے بعد  مسلم دوشیزاؤں کے جسم کو اپنی درندگی  کا شکار  بنانے کو تیار تھی ۔۔۔۔۔۔

نومولود بچوں کو جلتی ہوئی آگ میں پھینکا جا رہا تھا ۔۔۔۔

 تم کیوں میر ی جان لینا چاہتے ہو ؟ بے بس  مسلمان بہن جس نے  ابھی ابھی اپنی نگاہوں کے سامنے اپنے باپ اور بھائی کو ان درندوں کے ہاتھوں ذبح ہوتے دیکھا تھا ۔۔۔۔۔۔۔۔برما کی مظلوم مسلمان بیٹی ،ان ظالموں سے پوچھ رہی تھی ۔

تم محمد(ﷺ) کا کلمہ پڑھتی ہو ۔۔۔۔تم مسلمان ہو ۔۔۔تم یہ کلمہ پڑھنا چھوڑ دو ہم تمہیں چھوڑ دیں گے ۔۔۔۔۔۔

یہ دین تو مجھے جان سے بھی زیادہ پیار ا ہے اس کو کیسے چھوڑ سکتے ہیں ہم نے تمہیں تو کچھ نہیں کہا ۔۔۔۔تمہارے مذہب پر انگلی بھی نہیں اٹھائی پھر تم کیوں ہمیں  زندہ رہنے کا حق نہیں دیتے؟ ۔۔۔۔۔کیوں ہم مظلوموں کو مارتے ہو  ؟۔۔۔۔۔ کیا بگاڑا ہے ہم نے تمہار ا؟

اتنی حق گوئی ۔۔۔۔اتنی جرأت  وہ بھی  بدھ مت کے سفاک   پیروکارو ں کے سامنے ؟

اس عورت کی عزت کو تار تار نہیں کیا گیا بلکہ اس کی وڈیو بھی بنائی گئی ۔۔۔۔۔۔اس نے روتی ہوئی آ نکھوں ،درد و الم سے  چور چور  وجود کے ساتھ کہا: تم نے میرے باپ بھائی اور ماں کو میرے سامنے قتل کیا  لیکن تمہاری درندگی کی آگ نہیں بجھی  ،پھر تم نے میری عفت و عصمت کو تار تار کر دیا اب کم از کم اس کی وڈیو تو مت بناؤ ۔۔۔۔۔۔

درندوں کے قہقہوں سے بستی گونج اٹھی ارے   او  بنتِ اسلام  ! اس  وڈیو کو سوشیل میڈیا پر ڈالیں گے پھر ساری دنیا میں موجود تیرے مسلمان بھائی اس کو دیکھ کر تڑپیں گے اس لذت   کااپنا مزہ ہے ۔۔۔۔ مسلمانوں  کی تڑپتی لاشوں  کو دیکھنے میں جومزہ ہے وہ رقصِ طوائف اور سرورِ شراب میں بھی نہیں ۔۔

اب محمد بن قاسم ،صلاح الدین ایوبی جیسی غیرت کسی مسلمان میں نہیں رہی ،یہ کہہ کر ان درندوں نے    تیز دھار برچھی اس لڑکی شرمگاہ میں ڈال دی اور بنت ِ اسلام کی فلک شگاف چیخوں پر قہقہے لگانے لگے۔۔۔۔۔۔۔۔

کہاں ہو مسلمانوں پر دہشت گردی کا الزم لگانے والو؟

کہاں ہیں وہ سیکولر ولبرل دانشور جو ہمہ وقت اسلام کے خلاف بکواس کرتے  رہتے ہیں ؟۔۔۔۔۔۔کچھ منافقت ہی سہی ان مظلوم مسلمانوں کے لیے تم بھی لکھ دو ۔۔۔۔آسیہ ملعو نہ  کی حمایت میں   تو تمہارا قلم خوب گرجتا اور برستا ہے بنات ِ اسلام کی چیخوں پر تمہارا قلم کی  رفتار مدھم کیوں ہو جاتی ہے ؟۔۔۔پیرس کے اخبار پر  حملہ خوب ہائی لائیٹ کیا جاتاہے روہنگیا کے   مظلوم مسلمانوں پر ہونے والے ظلم و ستم پر   تمہارے لب کیوں سل جاتے ہیں ؟

اے خاصہ خاصان رسل وقت دعا ہے

امت پہ تیری آ کے عجب وقت پڑا ہے

جو دین بڑی شان سے نکلا تھا وطن سے

پردیس میں وہ آج غریب الغربا ہے

ایک انسان کی جان کی حرمت کعبے کی حرمت سے زیادہ ہے۔

  تو اے غلافِ کعبہ سے آنکھیں مس کرنے والے مسلمانو!

اے حجراسود کے عاشقو ! ۔۔۔۔۔اپنے لبوں سے  کعبے کو چومنے والے مسلمانو!

سوشیل میڈیا پر موجود سینکڑوں وڈیو ز موجود ہیں میانمار میں مسلمان بچوں کا گوشت کاٹ کر بدھسٹ کھا رہے ہیں ۔۔۔۔۔خواتین کی عفت و عصمت کو تار تار کر رہے ہیں ۔۔۔۔۔۔سفاکی ودرندگی کی انتہا ہو چکی ہے  مگر اقوامِ متحدہ خاموش ۔۔۔۔یورپین ممالک خاموش ۔۔۔۔مسلم ممالک بزدلی ،کم ہمتی کی چادر سے منہ ڈھانپے ہوئے ہیں ۔۔۔۔۔۔

احبابِ من ! میری آواز کو طاقت دے دیجیے ۔۔۔۔۔اس آواز کو آپ میرے ساتھ مل کر بلندکریں...ہر مسلمان مقرر,مدرس,مفکر,صحافی,عالم تک اس تحریر کو ضرور پہنچا دیجیے ۔

ہم سب مسلمان!!!!!!!!!! آواز بن جائیے روہنگیا  کے مسلمانوں کی ۔۔۔۔۔پوری ہمت  جرأت اور قوت کے ساتھ ان مظلوم مسلمانوں کے حق میں آواز بلند کیجیے اسلامی ممالک کی قیادت کو برانگیختہ کیجیے  کہ وہ  اپنی فوج کو   برما کے مظلوم مسلمانوں کی مدد کے لیے بھیجیں ۔۔۔۔عالمی سطح پر ان مظلوم مسلمانوں کے حق میں آواز بلند کی جائے اور مسلمانوں کے لیے  اندھی بہری اقوام متحدہ  کو  جھنجھوڑا جائے یا  پھر عام مسلمانوں کو جہاد کی  عام اجازت دی جائے  کیونکہ قرآن کا یہ ہی حکم ہے ۔

وَ مَا لَکُمۡ لَا تُقَاتِلُوۡنَ فِیۡ سَبِیۡلِ اللّٰہِ وَ الۡمُسۡتَضۡعَفِیۡنَ مِنَ الرِّجَالِ وَ النِّسَآءِ وَ الۡوِلۡدَانِ الَّذِیۡنَ یَقُوۡلُوۡنَ رَبَّنَاۤ اَخۡرِجۡنَا مِنۡ ہٰذِہِ الۡقَرۡیَۃِ الظَّالِمِ اَہۡلُہَا ۚ وَ اجۡعَلۡ لَّنَا مِنۡ لَّدُنۡکَ وَلِیًّا ۚ ۙ وَّ اجۡعَلۡ لَّنَا مِنۡ لَّدُنۡکَ نَصِیۡرًا 75:04

اور تمہیں کیا ہوا کہ نہ لڑو اللہ کی راہ میں  اور کمزور مردوں اور عورتوں اور بچوں کے واسطے یہ دعا کر رہے ہیں کہ اے ہمارے رب ہمیں اس بستی سے نکال جس کے لوگ ظالم ہیں اور ہمیں اپنے پاس سے کوئی حمایتی دے دے اور ہمیں اپنے پاس سے کوئی مددگار دے دے،

۔۔۔۔۔۔۔۔۔۔۔۔۔۔۔۔۔۔۔۔۔۔۔آئیے آواز بنیے ! برما کے مظلوم مسلمانوں کی ۔۔۔۔۔۔۔۔۔۔۔۔۔۔۔۔۔۔

ہر سمت مچلتی کرنوں نے افسوںِ شبِ غم توڑ دیا

اب جاگ اٹھے ہیں دیوانے دنیا کو جگا کر دم لیں گے

ہم امن و سکوں کے داعی ہیں سب ظلم مٹا کر دم لیں گے

ہم حق کا نشاں ہیں دنیا میں باطل کو مٹا کر دم لیں گے

یہ بات عیاں ہے دنیا پر  ہم پھول بھی ہیں تلوار بھی ہیں

یا بزم جہاں مہکائیں گے یا جامِ شہادت پی لیں گے

تحریر: محمد اسماعیل بدایونی

14اگست کی پُکار----یومِ آزادی کی خصوصی تحریر

۱۴ اگست  کی پکار۔۔۔۔۔۔تحریر: محمد اسماعیل بدایونی

کھانس کر دکھائیے ۔۔۔۔لمبی لمبی سانس لیجیے۔ شبانہ نے اپنے ننھے ننھے ہاتھوں سے پلاسٹک کے  stethoscope سے اپنے والد کو چیک کر تے ہوئے  کہا ۔

بابا جانی نے ننھی منی ڈاکٹر کے کہنے کے مطابق  زبردستی کھانسا بھی اور لمبی لمبی سانسیں بھی لیں 

گھر میں موجود شبانہ کی والدہ اور بھائی  ننھی ڈاکٹر کو دیکھ کر بہت خوش ہو رہے تھے ۔

بابا جانی ! میں بڑے ہو کر ڈاکٹر  بنوں گی  ۔۔۔۔شبانہ نے اپنی خواہش کا اظہار کیا 

ہاں بھئی میں اپنی بٹیا کو ڈاکٹر ضرور بناؤں گا۔بابا جانی نے پیار کرتے ہوئے ننھی شبانہ کو گود میں بٹھا لیا 

لیکن کچھ ہی دنوں بعد شبانہ کے والد ایک موذی مرض میں مبتلا ہو کر انتقال کر گئے ۔

شبانہ کے والد کا انتقال ہوئے کئی برس بیت چکے تھے ۔۔۔۔۔باپ کیا ہو تا ہے یہ باپ کے جانے کے بعد ہی معلوم ہوتا ہے 

امی ! میں ڈاکٹر بننا چاہتی ہوں  ۔شبانہ نے  انٹر کے  امتحان میں تیسری پوزیشن لینے کے بعد کہا 

بیٹا ! تمہارے بابا آج زندہ ہوتے تو یقینا ً وہ بہت  خوش ہوتے  اور تمہاری اس خواہش کی تکمیل ہو بھی جاتی  لیکن بیٹا ! تم جانتی ہو  یہاں تو روٹی  ،کپڑا اور مکان  کی تگ ودو ہی ختم نہیں ہو پارہی ہے اور میڈیکل کی پڑھائی  بہت مہنگی ہے ۔۔۔۔ایسا کرو تم بی اے کر لو   کم از کم گریجویشن ہو جائے گا 

نہیں امی نہیں ! اسے میڈیکل میں ایڈمیشن لینے دیں ۔فہد کی نگاہوں میں بچپن کا منظر  گھوم گیا یہ بابا جانی کی بھی خواہش تھی 

لیکن بیٹا ! میڈیکل کی فیس بہت زیادہ ہے ہم ضروریات بمشکل تمام پوری کر پا رہے ہیں  اور تم خواہشات کی بات کر رہے ہو اگر تمہارے والد  حیات ہوتے تودوسری بات تھی ۔

امی ! آپ چھو ڑ دیں  میں پارٹ  ٹائم کوئی جاب کر لوں گا لیکن  اپنی بہن کی خواہش ضرور پوری کروں گا ۔۔۔۔۔

فہد آفس  کے لیے گھر سے نکلتا ہے اور پھر واپسی میں نامعلوم ڈکیتوں کی فائرنگ کا نشانہ بن جاتا ہے ۔۔۔۔۔۔ 

بیوہ ماں کا آخری سہارا۔۔۔۔۔  خواہشات کو دفن کرتی  بے بس بہن 

تھانہ کلچر   ۔۔۔۔رشوت ۔۔۔۔آہ وبکا ۔۔۔۔۔جوان لاشہ کیا اٹھا   ماں کا کلیجہ چر گیا ۔۔۔۔۔۔ماں ہوش و حواش کھو بیٹھی  جوان بیٹی ۔۔۔۔۔۔

کوکھ سےجنم لینے کے بعد کیسے جوان ہو تی ہے اولاد کچھ خبر بھی ہے ؟۔۔۔۔۔۔۔۔اذیتوں کا  طویل تر ہو تا سلسلہ ۔۔۔۔۔۔

کہاں ہے انصاف۔۔۔۔کہاں ہے کوتوال ؟ سپاہی کہاں ہیں ؟ نظام کہاں ہے ؟ پوچھ رہی ہیں وہ ماں اور بیٹی 

کیا ہر روز ہمارے نوجوان یوں ہی سڑکوں پر مرتے رہیں گے ؟

کیا مائیں یوں ہی سسکتی رہیں گی ؟

کیا ظلم  یوں ہی جاری  رہے گا ؟

۔۔۔۔۔۔۔۔۔۔۔۔۔۔۔۔۔۔۔۔۔۔۔

آج میں یورپین انسٹی ٹیوٹ لانڈھی  کراچی  میں مہمان خصوصی  کی حیثیت سے مدعو تھا ۔۔۔۔۔۔میٹرک کلاس کے بچوں نے یہ ڈرامہ اسٹیج کیا تھا  ۔۔۔۔اس فرضی ڈرامے نے مجھ سمیت ہال میں موجود تمام لوگوں کی آنکھوں کو نم کر دیا تھا ۔۔۔۔۔۔

معلوم ہے ایسا کیوں ہو رہا ہے ؟

لاشیں کیوں اٹھ رہی ہیں ؟

سہاگ کیوں اجڑ رہے ہیں ؟

مکا ر سیاست دان لاشوں کی سیاست  کیوں کررہے ہیں ؟

سنو ! میرے دوستو! ہم برائی کو ہوتا دیکھتے ہیں اور سوچتے ہیں یہ ہمارا مسئلہ تھوڑی ہے  یہ تو  ہمارے پڑوسی کا دردِ سر ہے وہ جانے  اور اس کاکام جانے 

یہ وہ بیماری ہے جس میں ہم بحیثیتِ قوم مبتلا ہو چکے ہیں ۔

سوچیے !

 ایک پانی کے دومنزلہ جہاز  کی پہلی منزل پر سمجھدار ، ذہین  افراد موجود ہوں اور اچانک وہ جہاز  کے عرشے پر ایک شور سنیں کہ وہاں موجود بے وقوف اور احمق  لوگ جہاز میں پانی ختم ہوجانے کے باعث    جہاز کے پیندے میں سوراخ کرنے  جارہے ہیں 

اب آپ ہی بتائیے اگر پہلی منزل  میں موجود مسافر انہیں نہیں روکیں گے تو  کیا وہ محض غیر جانب دار ہو نے کی وجہ سے بچ جائیں گے ؟

کیا وہ نہیں ڈوبیں گے ؟

یقینا ً وہ سب بی ڈوبیں گے ۔

باری سب ہی کی آئے گی  بچے گا کوئی نہیں اگر تم چاہتے ہو  یہ خون کی حدت تمہارے گھر تک نہ پہنچے ۔۔۔۔۔۔۔۔۔

تمہارے دل  سے یہ دعا نکلتی ہے اے اللہ میرے بیٹے کو زندہ گر واپس لانا ۔۔۔۔۔

اگر تمہارے سینے میں ایک حساس دل ہے تو یاد رکھنا !!!!!!!

تمہیں ان درندوں سے لڑنا ہو گا ۔۔۔۔۔۔جو ہر سیٹ پر بیٹھے ملک کو دیمک کی طرح چاٹ رہے ہیں ۔۔۔۔جو مختلف محکموں میں موجود کالی بھیڑیں ہیں ان سے پاکستان بچانا ہو گا ۔۔۔۔۔۔۔اپنی ذمہ داری ادا کر نا ہو گی ۔۔۔۔۔۔اپنا کردار ادا کرنا ہو گا ورنہ بچے گا کوئی نہیں ۔

 یورپین انسٹی ٹیوٹ کے  نوجوان آنر  شہروز صاحب  کا بہت شکریہ آپ نے  نسلِ نو کے اذہان میں  فکر کے دیپ روشن کیے ۔۔۔۔۔۔وہ تمام ادارے جنہوں نے ۱۴ اگست کو شور شرابے سے ہٹ کر فکری انداز میں منایا اپنی  آنے والی نسل کی فکری آبیاری کا سامان کیا آپ سب کا بہت شکریہ ۔

کنواں کھودنا نیکی ہے تو کیا کافر کو اس نیکی کے بدلہ جنت ملے گی؟؟؟

ایک نوجوان کے ذہن میں اسلام کےمتعلق ابھرتے سوالات کا جواب

عاطف: سر ایک بات اور پوچھنی ہے

سر : جی پوچھیے

عاطف : کیا کنواں کھدوانا  نیک عمل ہے ؟

سر : بالکل یہ ایک نیک عمل ہے بلکہ انسانوں کی فلا ح کے لیے جو کام بھی کیا جائےوہ اچھا ہے

عاطف : تو سر پھر جب یہ نیک عمل ، انسان کی فلاح کے لیے کوئی غیر مسلم کرتا ہے تو آپ کہتے ہیں اس کو اجر نہیں دیا جائے گا  اس کو جنت نہیں ملے گی ۔

سر: عاطف بیٹا !  پھر وہی پرانی مثال: ملک کے شہری کو جو سہولت حاصل ہو گی وہ غیر  ملکی کو حاصل نہیں ہو گی

اسی طرح جو سہولت اطاعت گزار بندے کو حاصل ہو گی وہ غیر اطاعت گزار بندے کو حاصل نہیں ہو گی

اب اگر غیر مسلم کوئی اچھا کام کرتا ہے تو اس کو اس کااجر اس دنیا میں ہی دے دیا جائے گا اور جو  مسلم نیک عمل کرتا ہے اس کو اس دنیا میں بھی اور آخرت میں  بھی اجر دیا جائےگا ۔

ماں  کی ممتااپنے تمام بچوں کے لیے برابر ہو تی ہے لیکن اس پر بڑی خاص نظر کرم ہو تی ہے جو اس کا فرمانبردار اور لائق و فائق ہو

وزیر خزانہ نے کہا ہوا ہے جو فائل ریٹرن جمع نہیں کراتا وہ ٹیکس زیادہ دے گا  اور جو جمع کراتا ہے اس کو  فلاں فلاں سہولت ملے گی ایک ہی ملک کے شہریوں کے لیے دو علیحدہ علیحدہ قوانین کیوں ؟ اس لیے ایک وہ شہری ہے جو قوانین پر عمل کرتا ہے اور ایک نہیں کرتا

اب  جو کرتا ہے اس کے لیے رعائیت ہے    ۔

ایک او رمثال سے یوں سمجھو  ایک شخص ایک من حلوہ بنائے اور اس میں ذرا سا زہر اس میں ڈال دے  اب یہ حلوہ  کھانے کے لائق نہیں ر ہا  اس کو کھا کر زندہ نہیں رہا جا سکتا   لیکن دوسرا شخص جس نے ایک کلو حلوہ بنایا لیکن اسے طیب رکھا یہ حلوہ کھایا جائے  گا

اب اگر  کوئی شخص زندگی  کو حلوے کی مانند شاندار کر دے سارے لوازمات اس میں موجود ہوں  لیکن کفر کا زہر اس میں شامل رہے تو یہ  اس کو فائدہ نہیں دے گا  مسلمان کی زندگی میں ایمان کی خوشبو شامل ہے اس لیے  یہ آخرت میں کامیاب رہے گا

عاطف میاں ! آپ کے گھر میں فریج ہے ؟

عاطف : جی سر بالکل ہے

سر: بقر عید کا گوشت تو مہینے بھر چلتا ہی  ہوگا ؟

عاطف: جی سر!  مسکراتے ہوئے

سر: کیا وجہ ہے کہ گوشت سے بد بو نہیں آتی ؟

عاطف : فریج کی ٹھنڈک اسے سڑنے  نہیں دیتی

سر :بس  اب سمجھ جاؤ جو نیک عمل ایمان کی ٹھنڈک کے ساتھ کیے جائیں وہ سڑتے نہیں ہیں اور جو کفر کی گرمی میں کیے جائیں ان میں جلد بدبو پیدا ہو جاتی ہے ۔۔۔۔

تحریر : محمد اسمٰعیل بدایونی